心靈準備 P&E： Prepare

話咁快就一個星期,由訂婚到今日足足成個月呢。
今日再同牧者見面,正式開始為我哋o既婚姻心靈做準備啦!! 

我哋今日主要係填婚姻評估問卷：PREPARE / ENRICH，
填咗成二百題，真係手仔都軟。

呢個PREPARE / ENRICH婚姻評估，
喺婚前輔導裏面，係嗰非常常用ｏ既材料。讀輔導ｏ既三哥都知道佢哋存在呀！
全部都係SCALE RESPONSES題，
唔係難填，只要按即時反應答就可以。

先答自己ｏ既個人背景等基本嘢，
跟住係主打內容，涉及自己”過去”，”現在”同”將來”ｏ既各種狀態及價值觀，包括：
處事方式，家庭（崗位＆計劃），戀愛，金錢，信仰，及性。
同三哥一齊填問卷時，發現自己的閱讀能力真係好低．．．
三哥比我早成十分鐘完成，搞到自己好緊張、好趕，真係好有壓力！　

唔好睇佢好似得個二百題，又只係填反應咁，都做足成個鐘呀！　
但我相信我哋都好ｅｎｊｏｙ，雖然只係自己做，無溝通，
但我哋倆個係過程中，都有爆笑！
好明顯係有啲嘢，講得好中，令我哋”會心爆笑”！
牧者檢查完，仲比埋郵票信封我哋，寄份嘢去美國，
等三～四個星期收到報告後，再約我哋下次輔導ｏ既時間。


***************

完事後，妙子同三哥梗有就今日填ｏ既問卷頃計啦。
唔知你哋仲記唔記得，妙子提及過希望同牧者傾吓計先,
再同家人們講我哋倆個決定結婚呢？

三哥，一直都唔同意呢個做法呀，
但佢愛錫我，所以等待。
今日見面過後，三哥再提”提親”一事，
問我有無發現同牧者面談ｏ既三次（共兩牧者），
都無評價我哋適合／唔適合結婚。
反而係，遇到不合時點面對、處理同解決，
係著重點樣改善同經營。

呢個過程亦再次提醒妙子，
愛情＆家庭一樣，係重視點樣經營同改善關係！
所以，我哋諗住今週日先過第一關：提親。
姊妹們，一齊加油，努力呀！


***************
聖經：「愛是永不止息。」
＠　哥林多前書１３章４節