ｈｍ。ｗ 尋找。宴廳②

今日，繼續為咗視察場地，走到去尖沙咀，行咗個圈。
主要都係睇煌府o既場地。

先到，近佐敦o既１８８店。

煌府　１８８店

妙子同三哥一去到１８８煌府時，話想睇吓婚宴場地，店員就好主動咁轉介我哋比佢哋當日注場o既婚宴部專員，向我哋介紹場地設施，酒席菜單。場地間隔間都唔錯，專員推介翡翠廰比我哋。

妙子同三哥對個場地o既服務都好欣賞，就只係佈置以紫色為主。（我哋都覺得有點過紫，顯得有點俗氣）

鴻星　海港城

接住，妙子三哥行到去海港城o既鴻星。星期六中午茶時間，好旺，員工都無乜時間serve，所以只係望吓個場地大細，攞咗張卡片就走人了。但係呢，呢個場地o既大細四四正正（妙子大愛）、圍數都好適合妙子同三哥，我哋都好鐘意。可惜明年８月後，佢哋有計劃裝修，未可以release之後o既期比客人。

再黎，又係煌府。

煌府　帝后廣場店

呢間店係煌府o既新店，上個月先至正式開張。裝修以紫色為主同好閃，間隔都ok。單睇店面可以o架。

但係，加埋配套考慮時，呢間店o既位置有啲遍僻，而且地下有印度人開啲o既舖係度，等lift時有陣陣印度香料味．．．　妙子同三哥唔太接受。

煌府　幸福中心店

最後，我哋再走到對面o既幸福中心店，上到呢間店，妙子同三哥都眼前一亮。呢間店的間隔係我哋理想o既，可以兩個廳都成為獨立一角。

另外，睇咗咁多間煌府主要係用紫色佈置；當然，呢間店亦唔例外。但點解我哋會眼前一亮呢？因為，呢間店o既兩個廰都係有一邊係窓，令成間點好光猛，少咗好多紫色o既佈置。整體感覺好咗好多。

而當，我哋同婚宴專員傾多啲時，知道咗呢度的flexibility都好大，更加吸引我哋。被我哋例入考慮之一。

除咗呢幾個，仲有啲場想睇吓。希望可以同三哥抽到時間，去睇埋；同我哋o既統籌夫婦再開會後，就訂場啦～

大家，請記念妙子同三哥！